المسرحيون العراقيون يتطلعون إلى مرحلة ما بعد صدام حسين حسن الفقيه
المخرج قاسم محمد: "رسالة الطير" حاوره: ظافر جلود
ما زال أداء الممثل العربي يكتب بالشعر العمودي .. د. صلاح القصب
نص مسرحية ( رثاء الفجر ) تأليف قاسم مطرود
أسباب تراجع المسرح العراقي .. يوسف العاني المسرحي العراقي الرائد .. محمد كريشان
أمسية للمؤلف المسرحي قاسم مطرود : اكتب أكثر من نص في النص الواحد .. علي شايع قراءة متأخرة في الحزن العراقي .. علي شايع الخبر :تراجيديا المسرح الروسي , وأخبار أخرى ... علي شايع
شيخ الفنانين العراقيين.. اسعد عبد الرزاق: المسرح رسالة عظيمة.. ووسيلة شريفة لخدمة الإنسان .. |
"سلاما
عليكم" نص: فارس الماشطة عن : ضرر التبغ لشيخوف ( قدم العرض لاربع مرات في مدن هولندية) -------------------------2001/2000-------------------------- الشخصيات الأستاذ : قرابة الستين ، ملامح التعب باديه على وجهه وجسمه ، يرتدي سترة طويلة قديمة كالتي يرتديها قائد الأوركسترا ، تحتها يرتدي صديري – يلك – مثقب من الخلف ، على عينيه نظارة سميكة ، ويحمل ساعة قديمة بسلسلة . دايخ : موسيقي ومغني في حوالي الأربعين ، سكير ، مرح وعابث ، يرتدي سترة ذات مربعات ، ووردة مبالغ بها على قميصه . الدمية : دمية قبيحة ضخمة ( 3أمتار ) يحركها ممثل -----------------------------------------------
(في الكافيتريا الملحقه بصالة العرض)
( أثناء تواجد الجمهور في الكافتريا ، نجد دايخ يعزف ويشرب وبعدها يذهب للبار فينام ، عندها يدخل الاستاذ باحثا عن دايخ فيتفاجأ بالجمهور ) الأستاذ : دايخ ؟ دايخ؟ ( للجمهور مرحبا ) مرحبه .. مرحبه ، خوش لمه وخوش جمعه ، نتعارف ؟ أخوكم العبد لله إسمه مو على رسمه ، ولقبه مو على كد قدره ، مومهم منو آني بس المهم لو تكدرون تساعدوني ، وهذي خدمه ماراح أنساها إلكم ، كل القصه ومابيها آني داعيكم لمحاضره ، فبلكي تلبون الدعوه ؟ أدري قسم منكم طالعه روحه من المحاضرات والمناقشات ، وقسم قلبه خلصان من في الواقع والحقيقه وحيث أنه ولعله وثمة، لكن ماراح آخذ من وقتكم غير ساعه زمان ، ساعه وشويه ، وهذا فضل جبير لأخوكم العبد الفقير ، رأيكم موافقين ؟ تفضلوا واللي يكدر منكم يساعدني فياريت ( البعض يساعده في حمل عدة المحاضرة ، عارضة أو سبورة ، كتب ، ملصقات … ) تفضلوا منا ( يقودهم الى قاعة العرض ، ولكنه ينسى شيئاً ) بله دقيقه ، نعل أبو النسيان ، ( ينادي ) دايخ … دايخ … (يبحث عن دايخ ) وينه ؟… محد شافه ؟ كتلني ، مرمرني ، عذبني ، آخ منه ، فنان قبلنه ، موهوب على العين والراس ، بس هذا السم اللي يشربه يخلي فن ، يخلي موهبه ، وينه ؟ ( يبحث ) محد منكم شافه ؟( يظهر الدايخ على البار نائماً ) هم هنا كاعد ؟ تضيعه تلكاه بالماي خانه ، تدور عليه تلكاه سرحان ويه الربعيه ، دكوم عاد يرحم أبيك ورانه شغل ، (للجمهور ) واحد منكم يشيله اذا ماكو زحمه . ( للجمهور ) تفضلوا عيني منا ، هله بيكم ، إتفضلوا … (فــــــي صــــــــــالة العـــــــرض)
( يدخل الجميع الى قاعة العرض ، الأستاذ يحاول إجلاس الجمهور ) الأستاذ : جم رجال ليكدام إذا تسمحون ، اللي عنده جهال ( أطفال ) رجاءاً لويطلعهم ، لو يسكتهم، عذروني هذي الأوامر ، ترى عمكم الياكلها بعدين ، واحد من الشباب يوكف بباب القاعه اذا مابيها مغثه ، إثنين من الشباب ولو شابات بعد أحسن يعاونن عمهن ، علمود نحضر جو المحاضره ونرتب وسائل الإيضاح، وينه دايخ ، (ينادي ) دايخ ، دايخ ، لك وين صرت ؟ (يجده ) هم كاعد تلق ، ديله كافي عاد ، ونسنه الجماعه بشكم بسته بين ماحضر الشغل ( ينشغل الاستاذ بترتيب الديكور والأكسسوار ) ( فاصل غنائي موسيقي ) ( الى دايخ ) بس كافي ، أخذك الواهس وراح تكلبها جالغي ؟ كوم أكعد على صفحه . دايخ : ( مشيراً للقنينه التي فرغت ) البانزين إستادي ؟ الإستاذ : وكتها ، متصيرلك جاره ، موجود إهناك بالعلاكه … سيداتي آنساتي سادتي ، محاضرتنا اليوم ستكون عن ( يستدرك ) شو آني أخذتها جديات شوفوا ياجماعة الخير ، جمعتكم اليوم وألف رحمه على أهلكم طيبين كانوا أم ميتين ، علمود ألقي عليكم محاضره عن ضرر التدخين ،وأصارحكم ترى لا آني محاضر ولابروفسور ولا هم يحزنون، صحيح آني وبتكليف خاص وطيلة تلاثين سنه ألقيت عدة محاضرات علميه ، هيه مو علميه بالضبط بالضبط لكن هلحوالي ، فمثلا العام الماضي ألقيت محاضره شطولها شعرضها عن أضرار بعض الحشرات ..برغوث ..صراصير.. قمل ، حتى بناتي بوقتها عجبتهم المحاضره خاصة القسم الخاص بالأَرضه ، واستلهمت الموضوع حينها من الأرضه الموجوده بيتنا وداخله بالدواليب والكناتير والقريولات وواصله حتى للسقف ، و ورغم ذلك شككت المحاضره لانها ماعجبت الزوجه . أما اليوم فراح أحجيلكم عن ضرر التدخين ، والحقيقه ياإخواني وولدي ، انا مدخن من الدرجه الأولى ، لتكولون عني منافق أوجذاب ، كل القصه أن حرمنا المصون ، مرتي أقصد، طلبت مني ألقي عليكم المحاضره بدلها ، لأنها هل الأيام مشغوله ، ياعيني عليها ، بمؤتمر رعاية النسوان في بلاد الافغان ،فشكوا بيها واحد يساعد مرته ، لعد تقدميين وديمقراطيين بالحجي ؟ ماطولها عليكم ، آني ماأعرف الجك من البك من أضرار التدخين ، ولاأعرف شي من جسم الإنسان وتشريحه، لكن ماطول مرتي كالت حاضر، فآني لازم أكون كدها وأحاضر، وبصراحه آني أريد يسود الرضا والتفاهم علاقتي الزوجيه ، وماأريدها تتنرفز وتتعارك ويايه مثل ما لصتها قبل شهر بمحاضرة الجمعيات النسويه التعبويه ، لما وحده من الجمهور سألتني : مامعنى تعبويه أستاذ ؟ ها تعبويه ؟صفنت ، شراح أجاوبها هاي ، إحتاريت وقلت : ماسامعه واحد يعبي بالسكله ركي . ضحك الجمهور الحاضر وقتها ، لكن آني اللي كلتها من إرجعت للبيت . (مقلداُ الزوجه ) : ها ..شنو تعلم يصنف رجلنا المصون والله لتكون العقوبه جبيره .. مو هيجي؟( هو: هيجي ) غسل الجلاب بالصابون ( هو : بالشامبو والصابون )، تلث تيام زيارات للمرضى ( هو : تلث تيام ) تنظيف البيت كامل بين يوم ويوم ( هو : يوميه .. كله ولا زعلك حبيبتي ) … ومن يومها والتنظيف وغسل الجلاب على عمكم ، المهم الواحد يحافظ على خيمة العائله ويكعد بظلها.. هيجي لو مو هيجي ؟ نرجع إلموضوعنا ، ضرر التدخين ،( للجمهور ) بله إذا بيكم واحد طبيب ، بيطري ، أسنان ، خريج علوم ، تغذيه ، رجاءاُ يجي يكعد إهنا ليكدام ، حتى اذا غلطت وكمت أخربط يصلحلي ، ترى مابقى بيا حيل للمشاكل . نبدا بالمحاضره على بركت الله : فاللتبغ يااخوه مضار عديده منها وبحسابات الأنساق الصاعده والنازله ومابينهما( يقف ) وين كعد الشاب إلي حطينا واقف بالباب ؟ ليش أكعدت يمعود ،إسمحلي نسيت أكلك شتسوي ، تعرف تصوفر ؟حتى بس تجي حرمنا المصون تسوكنا بفد صفاره ، واذا متعرف كحه قويه حته لو عفطه ، زيك .. هل ليطلع منك هم ميخالف ، المهم تنبهني . إنتباه رجاءاً ، الأمة التي تدخن ، هي أمة لن يكتب لها تحقيق الخلود والإنتصار في كبريات المحن التي تخوضها خلال منعطفاتها التاريخية التي كتبها عليها الله سبحانه وتعالى ( يستدرك ) شوف أني ، خشيت بالمحاضره ونسيت المهم ، نشيد الإستقبال ، لإن حرمنا تحب من تشرف نستقبلها بتحيه تليق بمقامها العالي ، من فضلكم ساعدوني وإفهموني ( الىدايخ ) دايخ حاضر ؟ دايخ : بس هل الجغمه إستادي الاستاذ : مو هسه ، ولك الخاتون بعد شويه تجي ، دربنه الجماعه على النشيد وإلك عندي ربعيه . دايخ : إذا هيجي متفقين . ( للجمهور ) آني شكول أنتوا تردون : جكه جحجح .. جكه جحجح هيه جتي … هيه طلت والحزن للجو أضفت ( الاستاذ يصحح : والفرح للجو أضفت) جكه جحجح .. جكه جحجح الشعر منفوش أسود والوجه مصقول أجرد ( الاستاذ : مسدول بدل منفوش ) جكه جحجح .. جكه جحجح ( أمرد بدل أجرد ) من تأشر … من تنادي تكول داست على أفادي جكه جحجح .. جكه جحجح من تسالم …من تعادي نصيح ياستار هادي جكه جحجح .. جكه جحجح من تماوج بلون ذهبي جنها والله أحلام وهبي
الاستاذ : عفارم عليكم ياجماعه ، ولاتنسون اللحن ، وأذا واحد بيكم شاعر ويركعنياها بقصيده ترحيبيه فخير على خير . نرجع للمحاضره ، أرجو منكم ياساده أن لاتاخذون محاضرتي جديات ، وإلي ميعجبه أويضوج من هذا الموضوع الجاف ، فيكدر يحط كطن بذنه ، أو يروح لبيتهم ويفضها ( ينظر لساعته ) أخذني الوكت وهسه إحتمال تجي ، وإذا سمعتني أحجي خارج الموضوع فعزه عليه وعلى أهلي وعليكم . ( يقلب أوراقه ) فالتبغ إضافة الى تأثيراته الضاره ، فهو أيضاً نبات ويستخدم أيضا في مجال الطب ، فالذبابه مثلا ، إي نعم .. حتى الذبانه إذا حطيناها بجيس تتن وأقفلنا عليها فرح الخايبه تشوبح وتلوبح وتريد هوا صحي ويمكن تموت من حصرتها ، أو على الأقل يصير عدها إنهيار عصبي ، وتبقى تعيط إلحكولي إلحكولي : جيفة التتن من جوه والجيس مقفول عليه من بره( يهدأ ) أعذروني ياجماعه إذا شفتوا عيني اليسرى تغمز ، هاي عادتي من ألقي محاضرات وأنفعل ويه الموضوع ، أني شويه قلق ، وعصبي فلتاخذوها بغير معنى ، عادة الغمز هذي بدت ويايه من قبل تلاثين سنه ، وبالتحديد يوم 13 بنفس اليوم إلي ولدت بيه حرمنا المصون بنتي الجبيره فطم، وعلى فكره كل بناتي جابتهم مرتي يوم 13.. تكول منيشنه ، وبمناسبة الحديث عن حرمنا المصون فالله يحفظها ويعز قدرها عدها مسلخ رائع شكبره شكده تسلخ بيه كل أنواع الحيوانات اللبونه وغيرها ، مرفق بيه مركز فاخر لتحنيط الحيوانات الداجنه ، وتملك أيضا مصح فخم للأمراض العقليه والنفسيه ، أما معملي لتصدير المعادن النفيسه واللي ورثته عن الوالد اللي إطاكم عمره، فمرتي أيضا تقوم بإدارته من يوم ما دخلتني المصح العقلي ، كالتلي : ولك انته شلك بالأداره ياأثول ، أنت عليك الشؤون العامه .. ومن يومها آني أشتري الحاجات ، وإعلف الحيوانات ، وأداري المخابيل ، وأحنط الدواجن ، وأراقب العمال وكت الشغل ، وونس جلاب المره ، وأتصيد الفيران ، وكتل بالأرضه ، الإسبوع الماضي مثلا كان واجبي أسوي دولمه لضيوف مرتي على العشا ، لكن ضيوفها المحترمين وهمه دائما رجال ، ماعجبتهم الدولمه وكالو مالحه هوايه ، ومن طلعوا الضيوف وغسلت المواعين ونظفت المطبخ وجلفت القاع، بقه كدر الدولمه على حاله ، شتعتقدون أكدر أسوي بالدولمه ؟ بالأول قالت المره : روح وديها لجلاب الحراسه ياكلوها ، تالي كالت لا خطيه مالحه ، بعدين كالت أحسن شي وديها للمخابيل هديه مني بمناسبة عيد ميلادي ، لكن لا لا مو كافيه ، بعدين صفنت وقالت حنطها .. لا متطلع زينه ، وبعد تفكير توصلت الى حل : أكلها أنت يازوجنا المصون ، ياخراعة الخضره ، هيجي تسميني من تكون عصبيه .. خراعة خضره ، صدك آني خراعة خضره ؟ من الجوع مالتي طحتلكم على كدر الدولمه هبر ..هي باط هي بيط .. ماهمني مالحه لو حتى بيه زهر ، آني جوعان ، آني دائماً جوعان ، البارحه مثلا ما طتني مرتي وجبة الاكل وقالت : ها .. أكو خراعة خضره تاكل ؟ ( حركه في المدخل ) جتي ، بذمتكم أخوتي خواتي ولدي آني كل شي ماحجيت غير على التدخين وصخامه ( يذهب للمدخل ) ياإبني مو كتلك صوفر ، ( صمت وإنتظار ) لا موهيه ، موهيه ، مو دا أكول كالت ساعه وجايه ، كوم ولك دايخ لهينا الجماعه إنكطع نفسي ( صمت ) دايخ .. ملعون ، وين صرت ؟ دايخ : خليني نايم ، مابيه حيل الاستاذ : ولك كوم ، بعد شويه تشرف دايخ : ( كأنه يحلم ) دوخري شكد غثيثه …خوش حلم إستادي، خليني أخلصه الاستاذ : ياحلم يابطيخ ، أكلك على جيه دايخ : زقنبوت متخلونه نشرب ، والحلم هم ممنوع ؟ الاستاذ : لك دكوم عاد ، مرمرتني، اطيك نص ربعيه دايخ : لت تحاول كتلك ماكوم الاستاذ : ربعيه كامله دايخ : الهبب الي تطينياه مرتك بعد ماريده ، زوهرني ، سممني الاستاذ : لك مو أضربك ترى ها ؟( يضربه فيهرب ) دايخ : آخ .. آخ .. ماغني يعني ماغني ، خليها هيه إذا بيها خير تغني الاستاذ : والله لا أموتك ( يضربه ) دايخ : آخ .. آخ … بس كادر عليه ؟ فنك تكدر إلها ؟ ( يمسكه ) الاستاذ : وهسه ؟ دايخ : ماغني لو شميصير ، فوك منسويلها محاضرات ، ونغني ونركصلها ، ونتكاون ويه الجيران علمودها ، وفوكاها ننبسط ! الاستاذ : (يهجم عليه ويوسعه ضربا ) والله لتموت على إيدي اليوم دايخ : زين .. زين .. كافي مروتك إستادي ، أغني ، أغني ، وأركص إذا ردت ، بس بشرط .. تقرالي الدعه ؟ الاستاذ : زين خلصني، آقرالك دعه ، بس من تخلص المحاضره (فاصل غنائي موسيقي) علام الدهر شتتنا وطرنه ألف ياجيف مكضينا وطرنه ………….. ……….. الاستاذ : ( لدايخ )كافي ..كافي .. متصدك واحد يكلك غني ( يقلب أوراقه ) نرجع إلموضوع المحاضره : ( يقرأ ) أما بالنسبه للنساء الحوامل ، فالتدخين يضر أول مايضر الجنين ، فيخرج الطفل – بعيدا عن جهالكم _ براسين أو بتك عين أو بليا عفوا … اما البنات فربما ولاده منغوليه أوصلعه أو عدها شوارب ، وإذا توم فواحد عده أذن واللاخ عده الثانيه ، أو واحد عده دعبله ياحفيظ واللاخ عده الثانيه ، ويمكن الابو من القهر والحسره تطلعله الثالثه ، وحتى الأمايه يضربها خيط وتكوم تلعب دعبل بالشوارع ، وبمناسبة ذكر الابوه ، فنسيت أكولكم ترى أني أب ومربي جيد .. إي نعم ، فمرتي تعتمد عليه هوايه بهذا المجال وقبل سنه فتحنا مدرسه وكانت مهمتي التدريس وداعيكم يدرس كلشي من التاريخ والجغرافيه والاقتصاد السياسي والمنزلي حتى السولفيج والموسيقى والرقص وهز الكاوليه وإلدك إصبعتين وحرمنا المصون تاخذ إجور عاليه على التدريس وبيناتنا الحجي فمرتي الله يزيدها ويكثر مالها ، دائما تشجي وتبجي وتكول : منينلي ، ماعدي .. رغم هي نايمه على الاقل .. على الاقل بين سته الى عشر لهدات كل لهده إهيج .. لا والله إهيج وداعيكم مابجيبه فلس أحمر ، وبالنسبه للمدرسه فإذا واحد حاب يسجل أطفاله فالعنوان ، إكتبوا بله ، حي الإنتصار التاريخي ، زقاق رقم 13 ، رقم الفيلا 13 ، أعتقد حياتي مو ناجحه بسبب هذا الرقم لانه حتى بيتنا رقمه 13 وبناتي كلهن ولدن يوم 13 وبيتنا 13 جلب حراسه ، شكولكم بعد ، إي تذكرت ( يخرج كتبا ) هذي آخر إصدارات دار النشر مال مرتي ، وهذي الكتب الثمينه هي آخر مؤلفاتها وماتفتقت بيه عبقريتها العظيمه ، فإذا بيكم اليحب يشتري يتفضل والتوقيع لمن تجي ، وماطول صرنا ربع فراح أبيعه إلكم بنص السعر ، منو يريد ؟ محد ؟ زين بربع السعر ؟ محد ؟ آني جان وزعته بلاش وأخلصت منها بس آني اللي ما أخلص وراها ، ما أخلص ، دائما آني الياكلها ، 13 ، 13 ، 13 ، كبرت ، خرفت ، الضحكه لازم تكون على وجهي وآني ألقي المحاضرات ، لكن الواقع لازمتني عيطه ، صرخه ، وودي أصيح بأعلى صوتي ، أو أطير الى مكان بعيد ، بعيد كلش ، وهناك ما أشكي لأحد ، حاصرتني بجيه .. تقولون وبناتك ؟ لزوجتي سبع بنات .. لا عفوا ، أعتقد سته ، لا سبعه ( يتذكر ) بالله : محاسن .. تسواهن … راجحه … ومعالم … فطم … وغريبه ، سته مو سبعه لا بعد نسيت وحده ، خلي نجيبهن من الجبيره .. بالله فطم و محاسن وتسواهن وغريبه راجحه ومعالم وزهره ، زهره ، شلون أنسه زهوري ،بتي الصغيرونه الحلوه الحبابه ، شكد تمنيت أشوفها لابسه ثوب عرس أبيض مثل الثلج ،وإيديها بالحنه ، وفوك راسها دواغ بيه ورود خضره مثل كليبها ، زهره ، إشلون أنس زهوري ؟ آني صدك صاير أثول مثل متكلي مرتي .. خراعة خضره .. موحقها توديني كل شهرين تلاثه للمصح مالتها ؟ آني مخبل ، لاحك ، أمامكم أسعد أب ، نعم لازم أكون سعيد والكشره على وجهي ، 30 سنه والكشره لازكه على وجهي ، تلاثين سنه شلون مرت ماأدري ( ينادي الى الواقف في الباب ) ماجتي ليهسه ؟ خوش لعد أكدر أكول شما أريد وأطلع اللي بصدري… آني خواف هوايه … على طول مرعوب .. أخاف أفك حلكي كدامها … بناتي ماإتزوجوا ليهسه ، لان طالعين عليه خجولات وخوافات ، إتصوروا رياجيل ماشايفين ، مرتي متقبل ، متعزم غير ربعها على العشا ، بخيله هوايه وعصبيه هوايه ولغويه هوايه ، محد يزورنا بالبيت ، لكن أكلكم فد سر ، اليحب منكم يشوف بناتي ، وبلكن تصير قسمه ، فيكدر يشوفهم بالعطل الصيفيه والاعياد عد عمتهم ، وهيه جارتنا الحايط بالحايط لزك بلزك( دايخ يهم بالخروج ) : وين مولي دايخ : للتواليت ، للخلاء ، للطهاره ، رايح أسوي … هاي هم ممنوع الاستاذ : لتتعطل ، ترى على جيه دايخ : لتخاف ، وهناك بدربي أسوي بروفه على نشيد الاستقبال ( يعطيه الربعيه )هاك إستادي إلزم ، بس مو تلقها ؟ الاستاذ : ( يتأمل الربعيه ) الله… شكد صار لي ما شارب ! تدرون هاي يمكن سنه ؟ .. أكثر؟ .. مرات من أكون وحدي والمره مو بالبيت ، لو طالعه بجوله تفقديه للمصح ، لو عده طلبيه جلود جبيره ولازم تشرف على سلخها ، لوملتهيه تحنط ، لو ضايجه وما أدري بيا زاغور لافيه ، يعجبني وكتها أضربلي فد كاس ( يشرب ) ومن البيك الاول عمكم يقندل ويشعر بهدوء وبراحه نفسيه ( يشرب ) البيك الثاني يخليني غير شكل ، حزين وضايج وأتحسر وأكوم أتذكر أيام شبابي من جنت بالجامعه شاب حلو وسيم وغني ، البنات يتراكضن ورايا وآني ما أحب غير وحده بس هيه حبي الاول ، أسمع أم كلثوم وأتذكرها ، عبد الحليم وأحلم بيها ، أتخيل نفسي وياها وأني أسمع وحيده خليل من إتكول : فرشنا الرمل علشاطي وكعدنا ليلة عيد ذيج اليله عدنا ( يشرب ) طاح حظي ، قشمر ، حمار آني ، لا موبس حمار ، بغل عده 13 إذن ، شلون تركت حبي الاول وقشمرتني هذي الق … ( ينهض بصعوبه ) لازم أعوف كلشي وأروح … أريد أنهزم … أريد أشرد … أترك كلشي وما أباوع ليورا … وين أروح ؟ وين أطي وجهي ؟ … أنهزم من هاي الحياة الحقيره التافهه الرخيصه اللي حولتني أثول ومخبل … أشرد من هذي المره المرمره الغبيه التافهه اللئيمه العصبيه والبخيله واللي شلعت كلبي 30 سنه … أنهزم من مصحاتها ومراكز تحنيطها ومن جلاب حراستها ومن دور نشرها وقصورها … ما أريد فلوسها وأوامرها … أريد أنهزم أهرب ، وأروح لمكان بعيد من هنا … بعيد … بحقل لو بستان أوكف هناك جوه سما نظيفه زركه … اصير شجره ، اصير عمود كهرباء ،خشبه أوحتى خراعة خضره ، أباوع لنجوم الليل وحدي بليه مغثه وأنسى ، أنسى … أتحرر أتحرر من كلشي ( ينزع سترته ) حتى من هاي الستره المشؤومه الرثه الحقيره ولي ما إنزعتها من يوم زواجي الاغبر ( يرمي الستره على الارض ويدوس عليها ، فيظهر بالصديري – اليلك – المثقب والذي تظهر ثقوبه واضحه للجمهور) بعد ما أريدج ، أحتقرج ، أموت منج ، كافي … كافي … كافي ( يسقط من الإعياء ) دايخ : ( من الخارج ثم يدخل ) هاي غير طهاره ، لا مي ولا كهرباء بيها ، ومخطان الشيطان والارضه تارسيها ( يرى الاستاذ ساقطا ) هاي شبيك إستادي ؟ سكرت ؟ مو كتلك لت لقها ؟ هاي شمسوي بروحك ؟ ليش نازع سترتك ؟ ( يحاول إنهاضه )دكوم فدوه العينك ، يمعود على غفله وتجي ، والله ليروح جلدنا للدباغ . كوم ألف رحمه على روح أهلك الاستاذ : ( ينهض بصعوبه ) أقرالك الدعه دايخ : يادعه ياصخام ، وكتها إستادي ، (للشاب في الباب ) دخيلك صوفر الاستاذ : آني شكول إنتوا كولوا آمين اللهم إني أسألك برحمتك أن تسخط من في بالي قرد القرود ، زبالة اليهود ، غائط الاسود، عدماً في وجود اللهم إني أتوجه إليك بالرجاء ياعظيم الجود يامانح الضياء أن يكون الذي في فكري بريد الشوم وطريد اللؤم وثريد الثوم اللهم ياغافر الذنوب وساتر العيوب أسألك أن يكون أعدائي في برد العجوز وكربة تموز ووسخ الكوز اللهم سبحانك وبحمدك وجلال قدرك إدعو على من أكره أن يكون كرمد العين وغداة البين وفرقهم كما كانوا فراق المحبين ، وسمة المشين ، وأريهم سنين الطاعون وإمنع عليهم الماعون وإسرع بهم لساعة الحين ، آمين رب العالمين ( صفاره قويه ، أوعفطه من الشاب في المدخل معلنا مجئ الزوجه ) دايخ : ( مرعوبا ) جتي إستادي جتي ، كوم الله يسترك ، إلبس الستره وسوي نفسك تقره المحاضره الاستاذ : كولها الاستاذ بطل من الشغل دايخ : مروتك إستادي ، أبوس إيدك ؟ ( للجمهور ) ياجماعه نشيد الاستقبال لتنسوه ( يلبس دايخ الستره ويبدأ بقراءة المحاضره ) وبناء على هذا وذاك فإن التبغ يحوي على سم زعاف ، والخلاصه ترى ليدخن يموت وأبوه يستلك والسلام وعليكم . ( تد خل الزوجه : عباره عن دميه ضخمه ، شكل كريه جدا ، شعر أشعث ، شوارب مقززه ، وتدخل بحركات سريعه هستيريه، بإتجاه الاستاذ أولا فتنفصل منها ذراع ثم بإتجاه دايخ فتنفصل منها ثانيه ، ثم بإتجاه الجمهور فيتوالى سقوط أجزاء منها ، شعرها ، رأسها ، حتى تسقط كلية ، كل ذلك بمصاحبة نشيد الاستقبال السابق ) هيه جتي … هيه طلت والحزن للجو أضفت جكه جحجح .. جكه جحجح الشعر مسدول أسود والوجه مصقول أمرد جكه جحجح .. جكه جحجح من تأشر … من تنادي تكول داست على أفادي جكه جحجح .. جكه جحجح من تسالم …من تعادي نصيح ياستار هادي جكه جحجح .. جكه جحجح من تماوج بلون ذهبي جنها والله أحلام وهبي
إنتهــــــــــــــــــــــى -------------------------------------------------
فارس الماشطة/ هولندا / دلفت 2000/8/6
|
