|
كيف زيد وليش عبيد
مسرحية للأطفال
كتبها : محمود صبح
جميع الحقوق محفوظة
2004
شخوص المسرحية :
1. ماجد : شاب, 22 سنة,اعزب ويعيش في بيت خاص ويعمل تقني حاسوب
2. زيـد : دمية ... ولد في الثامنة من عمره يعيش مع ماجد
3. سمر : شابة عزباء ,20 سنة , جارة ماجد ,طالبة جامعيةوتعمل
كمرشدة في رياض الاطفال
4. عبيد : دمية .. ولد في الثامنة من عمره يعيش مع سمر
المكان : بيت ماجد ... ستوديو العمل
المنظر : (غرفة واسعة الوان جدرانها بارزة ومختلفة يستدل منها على
انها غرفة اعزب. على
طرفهاالايسر رفوف وعليها اغراض .. وفي الواجهة بار طويل يمتد على
عرض الغرفة وبارتفاع (1) متر ويراعي وجود ممران على الاطراف, على
البار شاشة حاسوب وعدة العمل).
( على انغام موسيقى ايقاعية المنبعثة من آلة التسجيل يدخل ماجد
وبيدة كرتونة فارغة )
ماجد : عبيد ... زيد... زيد ... عبيد ...
( يدير مفتاح المسجل فتنقطع الموسيقى ويخرج البوق من فم زيد)
زيد : مالك ..شومالك؟؟
عبيد : يا عمي خلونا نسمع وننبسط ..
ماجد : اسمعوا وانبسطو ... بس فش حاجة إتسمعوا الجيران واهل الحارة
... خلوه واطي ...
بعدين يا بتزمرو يا بتسمعو .. بنفعش التنتين مع بعض واحد عمبعطل
عالتاني.. صرلي ساعة عمبناديلكو وانتو مش سامعيني ... الضجة بتطرش
...
زيد : احسب حالك بعرس ... بتروح بتسكر السماعات.. وبتقول للفرقة
اسكتو .. ماتعزفوش ؟
عبيد : بدنا نتسلى .. خلينا نسمع ونرقص ونكيف ..
ماجد : انا مش ضد انكو تكيفو وتنبسطو بس عالرواق ... جارنا ابو
باسم طلع طفران مش
عارف ينام ... مهو بشتغل بالليل وبنام في النهار .. واحنا لازم
نراعي شعور الغير ...
زيد : شو يعني الغير؟ مين هدا الغير؟ ..
ماجد : انا الغير .. عبيد الغير .. سمر الغير .. جارنا ابو بسام
الغير .. كل واحد مش انتي منقول
عنه الغير ... وكل واحد فينا مفروض يراعي شعور الغير ..
عبيد :وشو يعني نراعي شعور ..
ماجد : يعني .. يعني .. كل واحد فينا بدو يعمل شي لازم يحسب حساب
الناس الباقيين انهن ما
يتضايقو او يتضررو من الاشي اللي احنا منعملو...
زيد : واذا احنا منسمع غناني ومنزمر شو بدياق ابو بسام ؟
ماجد : الغناني والموسيقى ما بتضايق.. بالعكس بتفرفح الروح وبتعطي
حيوية.. بس لما بكون
الصوت عالي كتير والزلمة بدو ينام لانه تعبان بتصير تضايق ..
عبيد : واحنا مين يراعي شعونا لانه احنا بدنا نسمع أغاني ونلعب
ونتسلى؟؟
ماجد : مسمحلكو تسمعو غناني وتتسلو وينتا بدكو.. بس عالواطي...
وتعالوا نتفق انه الناس
عادة بين الساعة تنتين واربعة.. يعني بعد الغدا بحبو ينامو... ومن
ضمنهن انا .. علشان هيك في هدول الساعات منعملش ضجة .. اتفقنا ؟
عبيد : اتفقنا ..
زيد : لا ما اتفقناش ... وانا وينتا ازمر واتمرن عالدربكة .. وينتا
العب .. ؟
عبيد : صحيح ...اناوينتا احضر الكابتن ماجد عالتلفزيون ؟...
ماجد : تعالو نتفق هيك ... منقسم الوقت بيناتنا ... انتي يا سيد
زيد بتتمرن عالدربكة وبتزمر لما انا بطلع اركض .. يعني من الساعة
خمسة للستة .. وبعدها السيد عبيد بغدر يشوف تلفزيون .. وباقي
النهار بتغدرو تلعبو وتتسلو وتسمعو غناني وتزمرو بس عالواطي وغير
عن هيك اتفقو بيناتكو ايش تعملو بالاول تسمعو غناني والا تزمرو
وتطبلو ... وبين التنتين والاربعة ..
زيد + عبيد : هدوووووووووء...هششششششششششششش
ماجد : خلينا نكمل شغلنا .. بعد في غراض كتير بدها زت بالزبالة
....
سمر
تدخل ) هاي ... يعطيكو العافي ... ياي شو هالحلو ... شو عمتعملو
؟؟؟
زيد : عمنرتب ... عمنزت الاغراض المستعملة اللي بدناش اياها ..
علشان نغدر نحط محلها
غراض مستعملة جديدة ..
عبيد : ( يضحك ) كيف هاي ..
زيد : ليه بتضحك ...
عبيد : الغراض المستعملة ولا مرة بتكون جديدة ..
زيد : هيه هي علينا ما انتي فاهم قصدي ...
سمر : ولا تزعل يا سيدي ان فاهمي قصدك .. ياي .. في هون كتير شغلات
حلوة .. وين
بتروحو فيها ؟
عبيد : عالزبالة ...
ماجد : ليش بتسألي .. في شي عاوزتيه..بدك اشي من هالغراض ؟
سمر : في كتير شغلات حلوة ممكن استعملها مع الاولاد في الروضة
منعمل منها لعب واشكال
.. بتسمحلي آخد منها...
ماجد : خدي اللي بدك اياه .. بتخففي عني ...
سمر : عن جد شكرا ... الاولاد راح ينبسطو وان راح اقلهن انه الغراض
هدية منك .. وانك
بتحبهن وبتراعي شعورهن ..انتي من الناس اللي براعو شعور غيرهن
وبتهتم بالناس.
زيد : يا ستي .. انفع غيرك بشي ما يضرك ...
زيد : سمر .. قال انتي غير ...؟
سمر : مش فاهمة شو قصدك ؟
عبيد : قال يا ستي ماجد بقول عنك انك انتي من الغير ..
سمر : هذا صحيح ... كل واحد غيرك .. بالنسبة الك بكون الغير ..
زيد : يعني انا لما بسمع غناني عالواطي بكون براعي شعور ابو بسام
..
عبيد : مش بس..
زيد : ان شالله كل ما واحد بدو يعمل اشي بدور يسأل الناس كيف اراعي
شعوركو ؟
سمر: لأ مش هيك .. بدون ما تسأل الناس انتي لحالك راح تحس ... راح
تعرف شو بدايق
الناس.. راح تعرف كيف تراعي شعور غيرك ..
عبيد : لما بساعد حدا ..هذا بنعده.. براعي شعوره ..
ماجد : طبعا .. لما بتعمل لحد شي منيح انتي بتكون عمبتراعي
شعوره... مثلا لما سمر تسالني
اذا بسمحلها تاخد اغراض هي بتكون بتراعي شعوري...انا بسمح لسمر
تاخد اللي بدها اياة انا براعي شعورها ... لما تكون تلعب بلعبة
وييجي عليك زيد زهقان وانتي تلاعبو بتكون بتراعي شعوره .. لما
بتكون ناقصك الوان للرسم وزيد يمسكك الوانه بكون عمبراعي شعورك ...
وهيك ..
زيد : يعني... لما انا براعي الغير الغير بدو يراعيني
ماجد : طول ما انا عمبعمل خير
عبيد : الدنيا تحلا بعيوني ... زبط عالوزن ..
سمر : حلو هذا مطلع غناي بجنن .. ( تدندن)
لما انا براعي الغير الغير بدو يراعيني
طول ما انا عمبعمل خير الدنيا تحلا بعيوني
(تبدأ الموسيقى للحن الاغنية) اغنية مراعاة الشعور
الجميع : لما انا براعي الغير الغير بدو يراعيني
طول ما انا عمبعمل خير الدنيا تحلا بعيوني
عبيد: باللعبة زيد اعطاني دورو لما عيي انا جيت ازورو
علشنو صاحبي براعي شعورو لما بزهق بواسيني
زيد: انا لما عبيد بيجي لعندي منلعب طابي منلعب شدي بلبس اواعيه
ماهوقدو قدي منرسم ومندهن بالواني
الجميع : منراعي شعور ابو بسام من شغله بروّح بدو ينام
ازعاج ممنوع الضجة حرام تيفيق منسمع غناني
زيد : انا بسكت لما بحكي الغير وبحكي لما عليّ الدور
براعي شعوره مع اني صغير وهيك الكل بحترموني
عبيد : انا لم ينادي جارنا ماجد بركض لعنده باجي اساعد
بسمع كلامه وما بعاند بحبه اوعو تلوموني
الجميع : لما انا براعي الغير الغير بدو يراعيني
طول ما انا عمبعمل خير الدنيا تحلا بعيوني
ماجد : انا وسمر كمان منحبكو يا احلى اصحاب ... بس اعملو معروف
خلينا نخلص ترتيب
لانه عندي شغل كتير فوق راسي....
عبيد: يللا ..
زيد: ييييييه... لاقيتها ...
سمر : شو هاي ...
زيد: لعبتي ..
سمر : هاي لعبة قديمة كتير ..
زيد: آه ماهي اللعبة اللي كنت انام معها وانا وصغير.. مكنتش اعرف
انام بدونها .. بتتذكرها
ماجد..ها ... هياها .. مش قلتلك انها موجودة ..
ماجد : مليح اللي لاقيتها ... مبروكي عليك ...
عبيد : هاي لعبة قديمة .. بعدين اذا كنو هالقد حابب منعملك واحدة
جديدة ,هاي عالزبالةارمي!
زيد : لا ..شو ارمي .. هاي احلى ذكرى عندي .. هاي بتضل جديدة طول
العمر .. صح ماجد .
ماجد : هي مش بضل جديدة ..بس اذا كانك حابب تخليها ذكرى ..خليها ..
سمر : حلوة ونغشة .. ما احلاها....
عبيد : شو هالهبل هذا .. احنا عمنزت الرابش وحضرتك عمبتجمع زبايل
ورابش ...
زيد : ماجد .. قوللو ..قوللو انها مش رابش هاي لعبتي ...
عبيد : ان مش فاهم لايش مغلبين حالنا وعم عمنعزل..لكان خللي كل شي
ع ما هو وخلص ...
سمر : لأعبيد .. كل واحد فينا حقة يحتفظ باشي عزيز عليه..شي من
طفولتو.. مين عملك اياها؟
زيد : ان عملتها .. هاي كانت كلسات لماجد.. بتي منهن انمزعت. وبدل
ما نرمي التاني عملت
منها لعبة زي ما علمتنا المعلمة في الروضة...
سمر : برافو عليك ... هذا اللي انا بسويه مع الاولاد بالصف ..ما
احلاها ...
ماجد : اكيد كل واحد في بيتو مجمع شغلات قديمة .. لانها بتذكرو
باشي حلو ... فمن حقة
يخبيها .. حتى لو هالشغلة مش مهمة عند ناس تانيين ..
سمر : صحيح.. فهمت يا عبيد ... استنى ..انتي مش هديك المرة سألتني
عن لعبةالخرخوش
انت كاين عاملها بالروضة مع المعلمة ... وقلتللي انك كنت مكيف
عليها لانك انتي عملتها بايديك ؟؟....
عبيد : آه صحيح ..بس انا بحبش هيك اخلي عندي شغلات قديمة ..لايش
..؟ هذا هبل .. بعدين
اذا بدي اشي بغدر اشتريه وينتا بدي ..
ماجد : صحيح بتغدر تشتري ايش بدك .. بس بتغدر تشتري ذكرياتك الحلوة
من الروضة؟ ..
هاي ايام ولحظات بترجعش ... ما ببقى منها غير الشغلات اللي تعلمتها
والشغلات اللي عملتها ...مثل لعبة الخربوش ..
عبيد : الخرخوش .. مش الخربوش ... هو صحيح يعني الواحد هيك بحب هيك
يعني ... بس
اكيد انزتت من زمان ... اكيد بشي سطل زبالة .. انا مش هلقد بحب
احتفظ بالشغلات ..
ماجد : طب ايش هي .. من ايش معمولة ..
عبيد : هيك .. طبلة صغيرة مدورة وعليها عصاي وخرزتين.. يعني مش
ايشي مهم تشغل بالك.
سمر : بس عنجد مش مشتاقلها ؟
عبيد : انا عارف هيك مرات بتيجي عبالي .. بس خلص صارت بالزبالة ...
وان مش هاممني.
زيد : ( يقوم من وراء البار ويخرخش )
عبيد : خرخوش .. هادا صوت خرخوشي ... منين .. وين .. كيف لاقيتو ..
زيد : شفته من زمان مرمي... عجبني ,خبيته ... ما كنتش عارف انه الك
..
عبيد : لا.. منيح اللي اخدته وضبيته . شكرا... قصدي .. هيك مليح
الواحد يكون عنده خرخوش.
ماجد : طب شو رايك تسمعنا نقرات خرخوش ...
عبيد ..هيك .. شوي ..( يخرخش ) انا عندي اقتراح ..
سمر : ها تفضل يا ابو الاقتراحات ..
عبيد : شو رايكو نقرر انه كل واحد مسموحلو يحتفظ هيك باشيا لالو
...
ماجد : انا موافق .. شو رايك سمر
سمر : وانا موافقة ..
ماجد : طيب .. بأكم غرض بتفكر ..
عبيد : واحد
زيد : تنين
عبيد :طيب .. بس مش اكتر من ثلاثة ...
اغنية الذكرى
يمكن اللي عندي مهم عندك مش مهم
انا بحافظ عغراضي ذكرى والشمل التم
غراض بتعوزا خليها حافظ عليها وخبيها
ييجي يوم تورجيها للجد والخال والعم
بدير بالي ع العابي بلعب انا واصحابي
صحابي هني احبابي نغاشة وخفة دم
شو بقدر اغراض الغير عغراضي شو بدو يصير
ولو صارو شي كوم كبير لا بزعل ولا بنغم
ماجد : يظهر انه اليوم مش راح إنخلص ترتيب ...
سمر : لأ ... ليش بتقول هيك ؟؟...
ماجد : لانه كل ما نيجي نشتغل ..الشباب الحلوين بطلعولي بموضوع
جديد ...
زيد : انا مني وعلي ساكت مش حاكي اشي ..
عبيد: قصدك يعني انا اللي بحكي ..
ماجد : مش مهم مين .. المهم خلينا نخلص ... سمر اعملي معروف
ساعديني بهاي الكرتونة ..
سمر : انتي تأمر..يللا تفضل ... ( يحملان الكرتونه ويخرجون )
زيد : عبيد .. عبيد ..ليه بتردش علي ..
عبيد : تحكيش معي ... انت مش صاحبي ..
زيد : ليه شو عملتلك ؟...
عبيد : انتي بدك تنجي حالك فبتروح معلقني ... "انا سكت ..مش حاكي
ولا كلمه)
زيد : من هاي زعلت ؟..
عبيد : مش بس من هاي ... انتي دايما بتعمل شغلات ضدي ... بس اقول
ابيض انتي بتقول
اسود ..بقول شمال بتقول يمين ... بقول هيك بتقول هيك تاني ...
زيد : مبين انو احنا عن جد مش صحاب !!!!!! كل واحد فينا اشي تاني
.. انا بحب شغلات
وانتي بتحب شغلات تاني ..
عبيد: انا مش مستعد اكون زيك ... اولا انتي لونك مش زي لوني ...
صوتك مش زي صوتي .
زيد : ان بحب المنقوشة بزعتر وانتي بتحب المنقوشة بجبنه ...
عبيد : انا بغني عاللحن ..انتي بتنشز ..
زيد : انا بعرف ارسم والون عالخط وانتي بتخربش ..
عبيد : انا بشجع مكابي وانتي بتشجع هبوعيل ...
زيد : يعني ؟؟؟
عبيد : يعني احنا التنين منغدرش نكون صحاب .. لانه كل واحد منا اشي
تاني ...
(ماجد وسمر يدخلان فيسمعان الحديث)
زيد : انا بحبش اصلا اكون صاحبك لانك عنيد وراسك يابس ...
عبيد : وانتي مدلل ومايع ...
زيد : بديش تيجي لعنا !!
عبيد انا مش جاي عندك ..انا جاي عند ماجد ... واذا ماجد بقوللي روح
بروح ..
ماجد : وانا مش ممكن اقولك روح اولا لانك صاحبي وتانيا لانك جاري
وتالتا لانك أمّور ودمك
خفيف ورابعا لانك صاحب جارتي سمر وخامسالانك صاحب صاحبي زيد..
عبيد : انا بحترمك وبقدرك وانتي صاحبي بس انا مش صاحب صاحبك زيد
...
سمر : ليه شو السيرة ع ايش اختلفتو .؟..
زيد : هيك احنا مش زي بعض كل واحد اشي تاني ..علشان هيك احنا مش
اصحاب ...
سمر : يعني علشان نكون صحاب لازم نكون زي بعض بالزبط ..
زيد + عبيد : آه ... بالزبط...
ماجد : يعني انا وسمر مش لازم نكون صحاب ...
زيد : شو دخل ... يمكن انتو زي بعض ...
ماجد : هي صبية وانا شاب ... هي بتعلم بالروضة وانا بصلح كمبيوترات
... هي بتحب الرقص
وانا بحب الرياضة ..
سمر : هو بحب الموسيقى الهادية واحنا بحب الموسيقى الحركة .. هو
بحب اللحوم وانا نباتية
باكلش لحوم .. بس بحب العب معه شدة ..بحب اروح معه عالسينما او
نحضر حفلة ..
ماجد : بحب ساعة مابدي احكي مع حدا احكي معها ... لما بكون فرحان
بتشاركني فرحي ولما
بكون زعلان بتواسيني ..ولما بطلب مساعدتها ولامرة بتتأخر ..
سمر : علشان هيك احنا صحاب ...
زيد : يعني ...
ماجد : يعني مش بالضرورة نكون زي بعض علشان نكون صحاب ...
سمر : لو بدنا نلاقي شغلات منختلف فيها... منلاقي كتير ... مثلا هو
عصبي كتير ..
ماجد : وهي هادية وبتطفيني ..
عبيد : وبعدكو صحاب ؟
سمر : علشان هيك احنا صحاب ... كل واحد بعرف عن التاني تقريبا كل
شي ...وبتقبلو زي
ماهو وبحاولش اغيرو لانه هذا هو هيك ولو بدو يتغير ببطل ماجد ..
بصير حدا تاني ..
ماجد : لو كل الناس كانو زي بعض .. كان الحياة بتكون بايخة وملهاش
طعمة .. تخيل لو كل
الناس بزمرو زيك .. كان طول الوقت منسمع زمامير ... تخيل لو كل
الناس بلبسو نفس اللون ... كان عيونا بتزغلل ... اتصور لو كل الناس
الهن نفس الوجه ونفس الشكل ونفس الشعر كان منغدرش نفرق بيناتهن ...
كنتو بتغدرو تعيشو في عالم كله نفس الشي
زيد : انا بزهق وبطق ...
عبيد : وانا بغدرش اتحمل ..
زيد : طب كيف نكون صحاب ؟؟
سمر : دوّر عالشغلات اللي انتو التنين بتحبوها .. مثلا ..
ماجد : مين بحب الفوتبول ؟؟؟
زيد + عبيد : انااااا..
سمر : مين بحب الغناني ؟؟؟
زيد + عبيد : انااااا..
سمر :مين بحب زيد ؟؟
سمر + ماجد + عبيد: أنااااااا
ماجد : مين بحب عبيد ؟؟
سمر + ماجد + زيد: أنااااااا
ماجد : مين بحب سمر ؟؟
زيد + عبيد : انااااا..
سمر : مين بحب ماجد
زيد+عبيد+سمر: اناااااا...
ماجد : شفتو ..في شغلات كتير كلنا منحبها... كلنا متفقين عليها ..
زيد : انا متأسف يا عبيد مكنش قصدي ازعلك ... انتي صاحبي واعز صاحب
..
عبيد : ولا يهمك ..انا كمان مليش صحاب غيركو ..وانتي اعز صاحب ..
ماجد : شو تاريخ اليوم ؟؟
سمر : ( تقول التاريخ بنفس يوم العرض ) بس لايش ؟
ماجد : هذا التاريخ من اليوم وطالع بكون عيد ..
سمر: عيد ايش؟؟
زيد+عبيد : عيد الصداقة .....
( موسيقى لاغنية الصداقة )
اغنية الصداقة
يللا نكون صحاب تع نلعب العاب
نرسم عالدفتر حكايا نقرا بالكتاب
زي زهر البستان احنا اشكال الوان
كل واحد الو حياته هو فيها رضيان
احنا ملح الارض احنا الهوا والمي
بطول الارض وعرض نشع بنور وضي
اجيال ورا اجيال بالدنيا ابطال
نزرع صداقة ومحبة ونغني موّال
اذا كنا مختلفين والا كنا متفقين
الصحبة لازم نرعاها بتدوم ايام وسنين
يللا نكون صحاب تع نلعب العاب
نرسم عالدفتر حكايا نقرا بالكتاب
ماجد : مش قولتلكو اليوم مش راح نخلص ترتيب ...
زيد: ولا يهمك ..انا وصاحبي عبيد راح ننفضها نفض ..
سمر : يللا ايدي بايدكو ...
عبيد : هاي جريدة امبارح بدك اياها ؟؟
ماجد : اه خليها ..بعدني مقريتهاش .... اشوف ...
سمر : شو مع هادا الصنوبر ...
زيد: عنا كتير منه ..
عبيد : عالزبالة ..
ماجد : ششششش.. شفتتي شو مكتوب هون ؟
سمر : لا ..ايش في ...
ماجد : ( يقرأ من الجريد) قرار من المجلس البلدي بترخيص بناء مجمع
تجاري على ارض
البلدية في حارة الداغر .. يعني بحارتنا ...وقد رصدت الشركة
المقاولة مبالغ ضخمة لاقامة المشروع .. وسيقام بالمجمع حوانيت
مختلفة ودور سينما وساحة لوقوف السيارات ...حلو ....
سمر : شو حلو ؟ انو حلو ... هذا خراب للارض والحضارة ..
زيد : ولعت !
عبيد : مالها معصبة ..
ماجد : انا عارف .. بالعكس ..سينما حد البيت ..موقف للسيارة
..دكاكين ..كل شي حد البيت
ايش العاطل ؟...
سمر : عاطل ..اكبر عاطل .. هذا المشروع لازم يتوقف ..
ماجد : عال .. بس ليش ؟؟
سمر: لانه كان في اقتراح لعملان جنينة ..حديقة عامة .. الناس ترتاح
فيها والاولاد يلعبو بدل
الركاض في الشوارع ... وخطر السيارات والسير ..
ماجد : برضو هدا مهم بس الظاهر انهن قررو ..وانتهى الموضوع ..
سمر : فش اشي انتهى ...
زيد : وكيف بدك توقفيهن ؟؟
سمر : بالقانون ..بالمحاكم ..!
ماجد : على مهلك .. اصلا مفش مشكلة قانونية ..
سمر: لازم نمنعهن ..
عبيد : كيف ...
سمر: منبعت مكتوب لرئيس البلدية ..منعمل لجنة في الحارة ..منطلع في
مظاهرة ..
عبيد : ومين راح يرد على هيك مظاهرة ..
سمر : عالقليلة بعرفو انو احنا ضد عملان مجمع تجاري هون في الحارة
..
زيد : شو يعني مظاهرة ؟؟
ماجد : يعني .. لما الناس ..كتير ناس يطلعو بالشارع وينادو بكونو
يا مع اللي بصير يا ضد
زيد : طب مش خطر عليهن بالشارع من السيارات ؟
ماجد : لا .. مهو لازم للمظاهرة رخصة وموافقة من البوليس ..ساعتها
البوليس بسكر الشارع
وبمنع السيارات تمرق ..
عبيد : ولايش بعملو مظاهرة ..
سمر : هذا اسلوب, طريقة في التعبير عن الرأي .. بدل ما الناس تقول
رايها بشكل فوضوي وكل واحد على كيفة .. بعملو مظاهرة وبكتبو لافتات
... عن الموضوع اللي بهمهن ..
ماجد : وبتفكري راح تلاقي ناس يوقفو معك ويساندوكي في المظاهرة ..
سمر : طبعا .. احنا راح نشرح للناس عن اهمية الموضوع ..اهمية
الجنينة ...بغدرو يعملو
مجمع تجاري في محل تاني ..بس هاي الجنينة للحارة ولكل اهل البلد ..
ماجد : شوفي المضبوط انا مع المجمع من ناحية ومع الجنينة من ناحة
تانية ... تنيناتهن مهمين
سمر : وانتي يا زيد ..
زيد: انا مع الجنينة ... بدنا محل نلعب فيو ..ومراجيح .. ودواوير
...
سمر: وانتي يا عبيد ؟
عبيد : لا .. انا مع المجمع التجاري ... دكاكين العاب وبوظة وبيتسا
وهمبورغر ... وبعدين
بالجنينة في دبان وهسهس ... بالمجمع في مكيّف هوا صيف شتا ...
زيد : شو هدا .. مش مسموحلك ..انتي لازم تكون بصفنا ...
سمر : كل واحد الو راي ولازم نحترم رايو ... حتى لو كان ضدنا...
واحنا هون الاغلبية
زيد: كيف؟؟
سمر : مين بدو مجمع تجاري ؟؟
عبيد + ماجد : انا .. ( يرفعون ايديهم)
سمر : مين بدو جنينة ؟؟؟
زيد وماجدوسمر: (يرفعون ايديهم ) اناااااا..
زيد: لحظة ماجد رفع ايدو مرتين .. هذا مسموح ..؟
سمر: مادام ماجد بأيد الطرفين ...مسموحلو ...
زيد : يعني ماجد معنا ...
عبيد : لأ معنا ...
ماجد : انا معكو انتو الاتنين ...
سمر : ها شفت .. احنا تلاته ضد اتنين ..يعني احنا الاغلبية ...
والاغلبية بتقرر ...
زيد : يعنى احنا دايما في الاغلبية ... واحنا راينا اللي بمشي ..
ماجد : لا مش اكيد ... بتعلق في الموضوع المطروح ... مرات رايك
بكون مع الاغلبية..
ومرات مع الاقلية ... ولماانتي تكون بالاغلبية لازم تراعي شعور
اللي في الاقلية..لانه لازم تعمل حساب لما انتي تكون في الاقلية ..
كيف بتحب يعاملوك ..؟
زيد: ( يرفع لافته كتب عليها انا مع جنينة ) إحنا بدنا جنينه
..إحنا بدنا جنينه ...
عبيد ( يرفع لافته اخرى كتب عليها انا مع مجمع ) ..انا مع المجمع
..انا مع المجمع ...
سمر: ( تنضم الى زيد ) احنا بدنا جنينه ..إحنا بدنا جنينه ..
زيد : ( يرفع لافته كتب عليها .. هذا عبيد تيس وعنيد, ويردد) هذا
زيد تيس وعنيد ...
عبيد : ما حدا تيس وعنيد غيرك ..
سمر : ايش هذا يازيد عيب اللي بتعملو ...
زيد : انا طالع بمظاهرة ضد عبيد ..
سمر : حقك تتطلع بمظاهرة ضد عبيد وتعبر عن رايك ... لكن مش حقك
تكتب شعارات
ولافتات مهينه وفيها مسبات ..
عبيد :انا مش راح اجاوب لاني اعقل منك ... مش راح اجاوب واحد تافه
زيك ..
ماجد : يعني شو الفرق بينك وبينه ... انتو التنين عمبتهينو بعض ..
ومش هيك الصحاب ..
عبيد : هو اللي بلش ... انا حر... انا مع المجمع ..شو بدو يمنعني ؟
ماجد : حقك تكون وين بدك وتقول رايك بصراحة وبشكل علني لكن من دون
اهانات.. واذا كان
هو غلط معك هذا مش معناه نرد عالغلط بالغلط .. تفضل ياسيد زيد
إعتذر واطلب السماح من عبيد ...
زيد : انا آسف ياعبيد ... وكنت بحب انك تكون بصفي يعني مع الجنينة
..
عبيد : لاني اعقل منك.. راح اسامحك .. ماجد .. مش انتي مع المجمع
يعني معي...
ماجد : انا مع الطرفين .. علشان هيك ما رح اشترك بالمظاهرة ...
اعزروني ...
سمر : حقك .. انا رايحة اكتب لرئيس البلدية واطلع منشور واحضر
للمظاهرة . (تخرج)
ماجد : وانا لازم اخلص ترتيب ... والا شو رايكو شباب ؟
زيد : الشغل عمرو ما بخلص .. خلينا نرتاح ونلعب شوي ..
ماجد : حاضر ياسيدي .. شو بدك تلعب ..
زيد : جاي على بالي اغلب عبيد بالضامة ...زي كل مرة .
عبيد : اصلا انتي بتعرف تلعب ضامة ...
زيد : ما انا دايما بغلبك.. اذا سمحت ماجد طلـّي اللعبة !
ماجد : حاضر يا استاز زيد تفضل ...وانا شو اعمل ..
زيد : غني .. مش انتي بتعرف تغني .. يا بتكون حكم بيني وبين عبيد (
موسيقى)
ضحكة ولعبة وتسلاية بين الاصحاب
نكتة ومزحة محلاية تـبسط الاحبــاب
العب طابة وبنورة واكرج كرجات خلي الدنيا تتملاّ ضحك وبسمات
اللي ما بلعب معنا وبسمع نغمات لحظات الفرحة بحياتو تصبح عذاب
خللي دروبك مضوية وتشعشع نور خللي البسمة عخدودك لمعة بلّور
بتعيش العمر بعرضو هنا وسرور ترسم صورة بدفتر وتقرا بكتاب
مرة بتكون الغالب او المغلوب يوم الحظ بيضحكلك يوم بالمقلوب
افرح وامرح واتهنى هذا المطلوب إن سكّر شباك بدربك افتح الابواب (
اعادة اللازمة )
عبيد : وهاياني ضمّنت كمان مرة
زيد : مهو مش معقول ... انا اللي لازم اغلب
عبيد :اتفضل العب اسا
زيد: هاي هون .. وباكلك حجرين ..
عبيد : انتي بتوكل حجرين وان بضمن كمان مرة وهيك اللعبة بتخلص ...
هيه ..هيه ..غلبتو!
زيد : هذا بنعدش غلب ... انتي كنت تغش ..
عبيد : عيب عليك انا مش غشاش !
زيد : مهو مش ممكن تغلبني ما انا اللي دايما بغلبك !
عبيد : وهاي المرة انا غلبتك ... تفضل جبلي قلمين وتلات محايات زي
ما اتفقنا ...
زيد : هادا مش عدل ..
عبيد : عالقليلة بسترجع شوية من اغراضي اللي خسّرتني اياها ..
زيد : شفت .. يعني انتي دايما بتخسر معاي .. واسا انتي كنت لازم
تخسر ..
عبيد: كيف بدك اياني اخسر وانا ربحان ... غلبتو ..غلبتو .. غلبتو
... اصلا انتي بتعرفش تلعب انا مش فاهم كيف كنت تخسرني ... هدا بس
لاني كنت اترخالك ...
زيد : اصلا مين علمك اياها لهاي اللعبة ؟ مش انا؟ خلص ياخي بديش
تلعبها ..
عبيد: ليه هيك حمرقت .. علشنك انغلبت ...
زيد : ( لماجد) ماجد قللو.. قوللو .. قوللو انه هو مغلبنيش وانه
انا اللي غلبت ..
ماجد : والمظبوط مين اللي غلب ؟
عبيد : طبعا انا .
زيد :هذا الغلب مش محسوب ...
عبيد : اتفضل جبلي قلمين وتلات محايات ... انا غلبت فبطلعلي
الجائزة ...
زيد : فش قلمين وفش تلات محايات ..انا بعترفش بهدا الغلب
ماجد : بنفعش هيك .. اذا انغلبت وكنتو متفقين على شي لازم تنفذ
الاتفاق
زيد : بفهمش ..انا اللي دايما بغلب
ماجد : عال بس هاي المرة هو اللي غلبك
زيد : انا خلص ما عدليش قعاد بهذا البيت انا راحل ..انا ماشي ..
ومعدتوش تشوفو وجهي
ماجد : وين بدك تروح يا مجنون .. في حدا بترك البيت وصحابه علشنو
انغلب بلعبة ضامة
زيد : انا حر .. وين شنطتي .. انا ماشي ( يفتش عن شنطته ويضع
داخلها بعض الاغراض )
ماجد : لعبيد ..مليح هيك ؟
عبيد : وشو بدك اياني اعمل اقول انغلبت وانا غالب ..بدك اياني اكذب
..هيك علمتنا ؟؟
ماجد : مش قصدي .. قصدي يعني لو إترختلّو شوي .. كان يمكن ..
عبيد : كان يمكن يغلبني مش هيك .. يعني هو المهم ..يعني انا مش مهم
.. يعني ايش بقول هو
لازم يمشي .. وانا معلش اخسر قلامي ومحاياتي ... يعني هو صاحبك
وانا لأ ..
ماجد : لأ ..مش قصدي .. قصدي انه نبقي مع بعض ونلعب ونتسلى مع بعض
ونكون صحاب
عبيد : الظاهر انه احنا منغدرش نكون صحاب ؟؟
ماجد : ها رجعنا لنفس الموضوع ؟؟
سمر : (تدخل ) هاي ... مالكو ..شو السيرة ؟؟
زيد
يخرج
من وراء البار) .. سمر بتقبلي آجي اعيش معك .. قصدي عندك بالبيت
سمر : اهلا وسهلا ... فش عندي مانع ..بس ليش ..شو مع ماجد ..
زيد : ماجد بحب عبيد اكتر مني ..خليه يشبع فيو وخليه يعيش عندو ..
ماجد : زيد ... زيد ..انتي عمتغلط .. اذا عبيد غلبك باللعبة هذا مش
معناه اني بطلت احبك
زيد : تقولش غلب هذا مش غلب !
عبيد : امبلا غلب ونص .. وبدي منك قلمين وتلات محايات ...
زيد : اتفضل خد هاي قلمين وتلات محايات ... ( يخرجها من الشنطة
ويعطيعا لعبيد )
عبيد : شكرا .. ( يتفحص الاغراض ) آه بس هدول المحايات انتي بتحبهن
لانه الهن ريحه حلوة
زيد : معلش ..خلص خدهن مش انتي غلبت ؟!
عبيد : انا مكنش قصدي هدول المحايات ..قصدي هيك ..يعني أي محايات
زيد : خلص يا خي مش انتي اللي غلبت ..خدهن .. انا متأسف اصلا اللي
العبت معك
ماجد : فكرتك راح تقول متأسف لانك قبلت الخسارة بروح رياضية ..مش
وانتي زعلان
عبيد : ماكنش قصدي ازعلو ..
ماجد : وانتي يا سيد عبيد مفش حاجة تعمل شوشرة كبيرة علشنك غلبت
..ما هو هيك اللعب يوم
غالب يوم مغلوب
سمر : بعدك حابب تسكن عندي ؟
زيد : آه طبعا ... بس بشرط ..عبيد ييجي لهون .. بتطاوقش انا وياه
ماجد : بس انا مش مستغني عنكو انتو الاتنين
سمر : وانا مليش صحاب غيركو
زيد : بس انا قررت .. وخلص ... بس وين انام
عبيد : ( بروح طيبة)بتغدر تنام على تختي اذا بدك ..
زيد : عن جد ؟
عبيد : آه وبتغدر كمان تلعب بالعابي وتتفرج ع تلفزيوني اذا عجبك ..
زيد : شكرا .. عن جد شكرا .. وانتي كمان بتغدر تنام بتختي وتلعب
بالعابي اذا بدك
عبيد : خد هدول المحايات .. هذا النوع انتي بتحبو كتير
زيد : لا ...مهو عندي غيرهن ... خلص خليلك اياهن ...
عبيد : ولما تزهق وبتحب تلعب مع حدا ناديني
ماجد : مادامكو هلقد متفقين ..شو رايكو كل واحد ينام في بيتو على
تختو مش أحسن
|
